Cervantes izarra:
kultura izarretaraino

Ara konstelazioan μ letraz ezagutzen dugun eta berezko izenik ez duen izar bat dago eta bere inguruan lau planetek euren ibilbideak marrazten dituzte. Mundu osoan ezaguna den egile baten inguruan ere lau pertsonaia ezagunek birak ematen dituzte. Aipatu sistema horren erdialdean dagoen izarrari Cervantes deitzea proposatzen dugu, Apolo galaktiko bat bailitzan, eta bere inguruan dabiltzan planetei aldiz, Kixote, Rocinante, Sancho eta Dulcinea, planeta-bizkartzainak bailiran. Kixote (μ Arae b) protagonista, bere izaera bezala orbita zertxobait eszentrikoa duen planetaren izen gisa ikusten dugu, ondoan bere lagun fidela den Rocinante duela (μ Arae d); biak eszenaren erdialdean kokatzen dira. Sancho ezkutari onbera (μ Arae e) sistemaren kanpoaldean mantso-mantso mugitzen da eta On Kixoterentzat hain ikusgaitza den Dulcinea xarmangarriak (μ Arae c) idazlearen bihotzaren ondoan du bere kokalekua.

Miguel de Cervantesek Kultura Unibertsalean duen garrantzia ukaezina da. Bere obra nagusia den On Kixote munduko literaturaren lehenbiziko nobela modernotzat hartzen da eta berebiziko eragina izan du literaturan. Zenbaitetan fikziozko lanik onena dela ere esan izan da. Hala ere, Shakespearek ez bezala, Cervantesek oraindik ez du tokirik esfera kosmikoetan. Izan ere, Uranoren sateliteek egile ingelesaren pertsonaien izenak dituzte. On Kixote nobelaren bigarren zatiaren argitalpenaren 400. urteurrena ospatzeko garaiz gabiltzan honetan, Cervantes Institutuaren laguntzarekin bultzatzen dugun proposamen honek Mantxako zaldun famatua izarrartean merezi duten tokia izatea bilatzen du.